Nasquèri a París (França) lo 30 de Mai de 1981 e i visquèri 10 ans. Puèi visquèri 7 ans a Moissida/Mussidan en Peiregòrd, dins lo nòrd-oèst d’Occitània, dins la region administrativa francesa d’Aquitània.
Faguèri d’estudis en Biologia a l’Universitat Paul Sabatier a Tolosa de 1998 a 2002.
De 2000 a 2003 estudièri la lenga occitana per correspondéncia a l’Universitat de Tolosa-lo Miralh (Licéncia en Lengas e Culturas Regionalas, mencion Occitan).
En 2002 comencèri de viure en Catalonha, ont acabèri mos estudis predoctorals en Biologia (Mestria en Biologia Cellulara e Fisiologia, especialitat en Immunologia) mercés al programa Erasmus a l’Universitat Autonòma de Barcelona.
En 2004 comencèri mos estudis doctorals en Lingüistica a l’Universitat Autonòma de Barcelona e sostenguèri mon memòri de Master en 2009 sus l’alinhament dels "leading tones" dins las declarativas qu’exprimisson lo desacòrd en occitan. Dempuèi 2009 trabalhi sus mon projècte de tèsi suls sistèmas prosodics de l’occitan e del francés en contacte, en cotutèla entre l’Universitat d’Osnabrück (Alemanha) e l’Universitat Pompeu Fabra (Barcelona, Catalonha).
Quand viviái en Occitània, me comencèri d’interessar per la musica e las danças tradicionalas. Comencèri de jogar de cabreta, una cornamusa tradicionala del nòrd-oèst d’Occitània, la vièla de ròda, e fin finala l’acordeon diatonic qu’es ara mon instrument de musica principal, qu’ai agut ensenhat a l’Aula de Música Tradicional i Popular a Barcelona e jogat dins diferents grops.

Curriculum vitae (en anglés): PDF