Situacion: Vòstra pita filha de 16 ans ditz qu’anuèch surtirá per far la fèsta. Es pita, e fau la susvelhar... Damandatz-li ònte vai, coma l’i vai e quoras tornará.

Interpretacion de l’enonciat: Enumeracion d'interrogativas parcialas

Informador: P. F.

Descripcion: Aqueste contorn compta sièis domenis intonatius. Lo primièr es l'interjeccion veire, que recep un movement ascendent del ton associat amb la sillaba tonica vei- seguit d'un accent de frasa mejan sus la pòstonica -re. Lo segond domeni intonatiu comença per un accent tonal naut sus la sillaba tonica òn- del mot interrogatiu, puèi lo ton davala progressivament per escalonatge aval fins a l'accent tonal un pauc mens naut associat a vas, que recep tanben un ton de frontièra bas. Lo domeni seguent es constituit per la conjoncion de coordinacion e, que recep un ton bas e un accent de frasa bas. Lo quatren domeni, coma lo segond, comença per un accent tonal naut sus la sillaba tonica co- del mot interrogatiu mas lo ton culmina dins la sillaba seguenta -ma, abans de davalar progressivament per escalonatge aval fins a l'accent tonal mens naut sul vèrb vas, que pòrta tanben un ton de frontièra bas. Tornam trobar la conjoncion de coordinacion e, que recep tornarmai un ton bas e un accent de frasa bas. Dins lo darrièr domeni, lo ton comença un còp de mai a un nivèl naut e marca un accent tonal naut sus la sillaba tonica -ras del mot interrogatiu quoras. Lo vèrb tornaràs comença per una pojada del ton sus sa sillaba iniciala tor- que recep un accent segondari, puèi i a per escalonatge aval fins a la darrièra sillaba -ràs, que recep un accent tonal un pauc mens naut e un ton de frontièra bas.

Enonciat: Veire, ònte vas, e coma l'i vas, e quoras tornaràs?