Situacion: Voletz èsser tranquille/a, mas lo bruch s’arrèsta jamai dins vòstra maison. Damandatz-vos a vos-mèsme/a si i aurá jamai un pauc de tranquillitat, dins ‘quela maison.

Interpretacion de l’enonciat: Interrogativa absoluta retorica, amb calhetatge de malcontentament

Informador: G. F.

Descripcion: Trapam aicí dos domenis intonatius. Dins lo primièr, lo ton comença per far un movement ascendent fòrça marcat fins a un nivèl plan naut de la tessitura de la locutritz sus la sillaba iniciala i au- e davala progressivament, en marcar dos accents tonals de mens en mens nauts sul subjècte expletiu eu e la sillaba tonica -ment: i a escalonatge aval (downstep). Lo domeni intonatiu s'acaba sus un movement ascendent plan marcat sus la sillaba tonica -tat, que recep en mai un accent de frasa bas. Lo segond domeni intonatiu correspond a un complement circomstancial de luòc dislocat a la drecha. Observam un accent tonal naut pauc marcat sus la sillaba tonica 'quela, puèi lo ton davala fins a la darrièra sillaba -son, que recep un movement ascendent plan important del ton, seguit d'un ton de frontièra bas. Aicí, l'accent de frasa e lo ton de frontièra basses, amassa amb lo movements ascendents marcats de la fin dels domenis intonatius, denòtan clarament lo malcontentament exprimit per la locutritz.

Enonciat: I aurá-t-eu un moment de tranquillitat, dins 'quela maison?!