La tòca de l’Atlàs interactiu de l’intonació de l'occitan es de presentar sistematicament una seria de materials àudio e vidèo per l’estudi de la prosodia e de l’intonacion dels dialèctes occitans, de sòrta que se pòsca començar un estudi de l'importanta diversitat dialectala de l’intonacion occitana. Mercés a las mapas del domeni lingüistic, l’usatgièr pòt accedir d'un biais simple a diferents materials àudio e vidèo dels diferents parlars occitans. Per cada localitat, inclusèm los tipes de materials seguents: 

• Exemples de diferents tipes de contorns intonatius (qualques 48 contorns per localitat). Cada ficha conten la descripcion e l'interpretacion del contorn, lo fichièr de son, la corba de frequéncia fondamentala e lo contorn intonatiu e l’etiquetatge en Oc-ToBI.
• Un fragment de parla obtengut d’un biais semidirigit mejançant lo metòde dels Map Tasks. 
• Un fragment de parla espontanèa o d’entrevista en vidèo.  

Aqueste projècte s’inscriu dins un programa de portada internacionala que vòl prepausar un sistèma d’etiquetatge tonal ToBI per diferentas lengas (http://www.ling.ohio-state.edu/~tobi/). Sus aquel sit, i podètz trapar la proposicion de nòstre grop de recèrca per la transcripcion prosodica del catalan Cat-ToBI, explicada dins un manual ont se mòstran d'exemples de diferents patrons intonatius e los simbòls utilizats per l’etiquetatge. Lo sistèma Oc-ToBI es encara en cors d'elaboracion e i se mostrarà aitanlèu que n'aurem una version pro satisfasenta.

Volèm qu'aqueste sit web siá una aisina utila aitanplan per la recèrca coma per l'ensenhament. Quant a la recèrca, adusèm als cercaires tota una seria de materials sonòrs per l’estudi de la prosodia e de l’intonacion occitanas. Quant a l'ensenhament, aqueste sit porgís un accès aisit a d'exemples sonòrs de las intonacions de divèrsas varietats de diferents dialèctes de l'occitan. A travèrs un aplech comparatiu, se pòt far de comparasons de contorns equivalents dins diferents dialèctes. Òm poirà tanben aprene, mercés al manual Oc-ToBI, a etiquetar prosodicament de mòstras d'occitan parlat. E fin finala, lo sit web conten tanben una rubrica de ressorgas qu'inclutz de bibliografia especializada sus l’intonacion.